Արևի ոսկեճառագայթը խոցեց օդը և դեմ առավ սպիտակ, փափուկ փետուրին, որը դանդաղ իջնում էր գետին:
— Ի՜նչ գեղեցիկ ես, — բացականչեց ճառագայթը:
— Առաջ ես կարապի թևի մի մասն էի և օգնում էի կարապին թռչել: Բայց այժմ ես կորել եմ և ընկնում եմ, — շշնջաց փետուրը:
— Ես կփրկեմ քեզ, — փայլեց ճառագայթը:
Նա գրկեց փետուրը և նրանք միասին իջան գետնին: Տներից մեկում ոսկեճառագայթը տեսավ բաց պատուհան, սեղան և սպիտակ թուղթ: Ճառագայթը զգուշորեն դրեց կարապի փետուրը ճերմակ թղթին:
— Ինչ մաքուր թերթ է: Նրա վրա կարելի է գրել ամենաերկնայինը, — ուրախացավ փետուրը և սկսեց գրել լուսավոր և թեթև բանաստեղծական տողեր:
Գիշերեց, արևի ճառագայթը թռավ և փետուրը քնեց: Հաջորդ օրն ընկերները կրկին հանդիպեցին և կրկին ամբողջ օրը բանաստեղծություններ էին գրում:
— Ճառագայթիկ, ինչո՞ւ դու մեզ հետ չես խաղում արևային նապաստակներ, մարգագետնում չես համբուրվում ծաղիկների հետ և դրա փոխարեն ամեն օր թռնում ես ինչ-որ փետուրի մոտ, — հարցրեցին ոսկեճառագայթին նրա ճառագայթ եղբայրները:
— Դա կարապի փետուր է: Նա գրում է բանաստեղծություններ, իսկ ես տարածում եմ դրանք աշխարհով մեկ: Այդ բանաստեղծություններից աշխարհը դառնում է ավելի լուսավոր և ջերմ , — բացատրեց ոսկեճառագայթը:
— Մի՞թե ճառագայթները կարող են ընկերություն անել փետուրների հետ, — զարմացան արևի ճառագայթները:
— Մենք իսկական ընկերներ ենք: Մենք երկուսս էլ սիրում ենք երկինքը, թռիչքը և լույսը: Բայց միայն միասին մենք կարող ենք նվիրել մեր սերը աշխարհին, — փայլեց ճառագայթը:
— Ճառագայթները լույսի բարեկամներն են, իսկ փետուրները լույսի հետ ոչ մի կապ չունեն, — առարկեցին եղբայր ճառագայթները:
— Իսկական ընկերությունը ճիշտ ընտրած ազգականություն է, — փայլփլեց ոսկեճառագայթը և թռավ կարապի փետուրի մոտ:
Թարգմանությունը կատարեց Տիգրան Գրիգորյանը: